Mengenal ‘Sukatan’ Padi

Tukang Tulih: Irwan Malin Basa

Urang Minang dari dahulu mamiliki bamacam macam ukuran baik untuk ukuran panjang, isi atau volume, ukuran barek dan lain sebagainya. Kini lah banyak ukuran tu nan lah hilang atau indak dipakai lai.

Ado ciek ukuran padi nan paralu kito tahu yaitu ‘sukatan’ atau adopulo nan manyabuiknyo ‘gantang’ padi. Gantang Iko dibuek dari batuang. Biasonyo Pangka batuang nan diambiak karano labiah gadang dan labiah kareh supayo bisa tahan lamo.

Sukatan tu gunonyo untuak maukua jumlah padi. Ado nan manyabuiknyo Sasukek, Adopulo nan manyabuik sagantang. Di zaman dahulu, padi dietong dengan sukatan dan isi satu sukatan atau sasukek padi tu manjadi saliter bareh kalau lah ditumbuak.

Untuak ukuran nan labiah gadang, adopulo namonyo katidiang. Sakatidiang isinyo 40 sukatan atau 40 Sukek. Adopulo nan isi katidiang tu 50 Sukek. Tagantuang kebiasaan dek sia nan manggunokan. Tapi biasonyo katidiang 50 tu untuak urang nan laweh sawah dan bagala Datuak.

Kini alat ukua dari batuang tu jarang dipakai dek masyarakat kito. Ukuran kini yang acok dipakai adolah kilo. Ditimbang jaleh jaleh. Ukuran kilo tu lah standar atau samo di seluruh dunia. Sakilo tu 1000 gram. Indak labiah indak kurang.

Walaupun indak dipakai lai, kito paralu juo tahu namonyo, bantuaknyo, dan isinyo. Sabab itu adolah salah satu budaya kito nan pernah ado dari dahulu. Dek nan nudo mudo kini tantu sukatan padi tu lah manjadi barang langka. Banyak nan indak tahu.

Print Friendly, PDF & Email
Baca Juga :  Beberapa Tokoh PRRI di Kecamatan Pariangan
banner 120x600